No ano 2016 creouse o Consello Asesor de Pacientes da área sanitaria de Vigo, o primeiro Consello de área de Galicia e un dos poucos de España.

O Consello Asesor de Pacientes, constituído por representantes de medio centenar de Asociacións, é unha estrutura de participación e asesoramento á Comisión de Dirección da Área Sanitaria de Vigo. O seu obxectivo fundamental é establecer e consolidar as canles de comunicación e de interlocución necesarias para que a opinión dos pacientes sexa escoitada, así como estreitar os mecanismos de cooperación dirixidos a mellorar a saúde e o benestar da nosa poboación.

Nesta liña, para facer efectiva a participación deses colectivos no sistema sanitario tense incorporado a Voz dos pacientes ao Plan Estratéxico XXI da área de Vigo. O Plan Estratéxico é un proxecto participativo no que diferentes comisións de traballo definen o papel, as características e as liñas de acción a nivel asistencial, docente e de investigación desta área sanitaria no seu conxunto. A opinión dos pacientes é fundamental na toma de decisións organizativas ou fundacionais relevantes na planificación futura da área viguesa. De feito, o seu lema é “Un Plan de tod@s e para tod@s”.